ABIHAYIMANA BAFITE URUHARE RUKOMEYE MU KWITA KU RUBYIRUKO


Amatangazo, CEPJ 23/10/2017

Itangazo risoza inama rusange ya Komisiyo y’Inama y’Abepiskopi ishinzwe Ikenurabushyo mu Rubyiruko (CEPJ)

Guhera ku itariki 20 kugera 22 Kamena 2013 mu kigo cy’imyiherero cy’ababikira Oblates du Saint-Esprit kiri i Mbare muri Diyosezi ya Kabgayi hateraniye Inama Rusange ya Komisiyo y’Inama y’Abepiskopi Ishinzwe Ikenurabushyo mu Rubyiruko iyobowe na Perezida w’iyo Komisiyo Myr Servilien NZAKAMWITA akaba n’umushumba wa Diyosezi ya Byumba.

-Abari mu nama barebeye hamwe aho imyiteguro y’Ihuriro rya XII ry’urubyiruko ku rwego rw’igihugu ( XII Forum National), rizabera muri Diyosezi ya Ruhengeri guhera tariki 13 kugera 17/11/2013, rigeze.

Basanze Diyosezi ya Ruhengeri yaratangiye imyiteguro kandi igenda neza basaba amadiyosezi n’abandi bazitabira iryo huriro gutangira gutegura urubyiruko bazohereza kugira ngo ruzaze ruzi ibyo rujemo.

Bongeye gutsindagira ko bifuza ko imiryango ya Agisiyo Gatolika y’urubyiruko yazagaragara muri iryo huriro.

Bifuje kandi ko imiryango y’abihayimana nayo yakwitabira iri huriro kugira ngo ishyigikire urubyiruko.

Bagaragaje kandi impungenge ku mutungo uzakoreshwa muri iryo huriro utaraboneka, basaba ababishinzwe kongera imbaraga mu kuwushaka.

-Iminsi Mpuzamahanga y’Urubyiruko (JMJ/WYD) ya XXVIII izabera i Riyo de Janeyiro muri Berezili kuva tariki 23 kugeza 28/07/2013. Imyiteguro y’itsinda rizahagararira u Rwanda igeze kure kandi iragenda neza. Bibukije ko abazajyayo bagomba kumva ko bahagarariye abandi, kandi ko iyo bagarutse bagomba kubagezaho uko byagenze. Mbere y’uko bagenda bazagira umwiherero ubategura.

-Urubyiruko rw’u Rwanda rutumiwe mu Ihuriro ry’urubyiruko rw’i Burundi rizabera muri Diyosezi ya Ruyigi muri Kanama uyu mwaka.

-Bagize icyo bavuga ku mikorere y’inzego z’urubyiruko. Inzego z’urubyiruko zagombye kubaho kandi zigakora kugera mu miryango remezo.

Zimwe mu ngorane z’imikorere y’izo nzego n’uko urubyiruko rubonako Padiri Omoniye ariwe ugomba kurutekerereza bityo bigatuma uruhare rw’urubyiruko rutagaragara. inzego zikaba ziriho ku izina gusa ariko zituzuza inshingano zazo.

Bifuje ko urubyiruko rwagira umwanya w’ibanze mu birukorerwa.

Bifuje ko haba gukorera mu mucyo ku bijyanye n’umutungo w’urubyiruko ku nzego zose. Rukagaragarizwa imikoreshereze y’uwo mutungo

-Abari mu nama barebye kandi bimwe mu bibazo bikomereye urubyiruko muri iki gihe:

Ibiyobyabwenge n’ubusinzi: basanze umubare w’urubyiruko rufata ibiyobya bwenge ugenda urushaho kwiyongera mu bahungu no mu bakobwa kandi bigatangira bakiri bato. Ubusinzi burarushaho kwiyongera mu rubyiruko. Ni ngombwa ko abashinzwe uburezi (ababyeyi n’abarimu) bahagurukira rimwe bagatabara urubyiruko rwinshi rushobora kwigarurirwa n’ibiyobyabwenge n’ubusinzi.

Ingeso y’ubusambanyi : basanze igenda yiyongera igatangirira mu abana.

Bikaba bigaragara ko ababyeyi n’abarezi bateshutse ku nshingano zabo. Ibishyigikira urubyiruko muri izo ngeso nabyo byariyongereye aho ubu ubishaka wese abona agakingirizo hafiye nyamara bikaba byaranagaragaye ko tutanakoreshwa uko bivugwa uhereye ku mubare w’inda z’indaro urushaho kwiyongera.

Imvugo zateye zitaka ikibi: amagambo y’urukozasoni n’amashusho bikwirakwizwa n’itangazamakuru. Ibyari ibyaha, ibyari amahano bigafatwa nk’ibintu bisanzwe. Ku maradiyo, mu binyamakuru, za filime (barebera ku matelefoeni), internet n’ibindi aho bakoresha amagambo biboneye bifatwa nk’ibisanzwe kandi bimunga imyumvire y’urubyiruko birugusha mu mitego myinshi. Abashinzwe ku byamagana barebera.

Kutubaha ubuzima bishingiye ku kwikunda (égoïsme): abari mu nama bibukijeko gukuramo inda bisigaye byeze ari ukwica birenze amahano kuko uwicwa aba adashobora no kwirengera cyangwa kuvuga. Kandi akicwa n’abakagombye kumurengera. Byaba bibabaje ko mu gihe abantu baririmba uburenganzira bw’umwana aribwo barenga bakica abana.

Kuri iki kibazo basanze ibintu bijya irudubi kuko n’abana bato b’abakobwa basigaye bahabwa uko bifuza, ibinini bikuramo inda (pilules du lendemain). Umuntu akibaza abo bategarugori b’ejo agaciro bazaha ubuzima niba batangiye kububangamira bakiri bato.

Abari mu nama bahereye ku bushakashatsi bakoze hirya no hino mu gihugu aho bari baturutse, basanze urubyiruko muri rusange rutarishimiye itegeko ryatowe ryemera gukuramo inda ku mpamvu zimwe na zimwe.

Basanze ahenshi urubyiruko rutazi inyigisho za Kiliziya kuri ibi bibazo bifuzako mu buryo bunyuranye bukoreshwa mu kwita ku rubyiruko bagaruka kenshi ku bibazo birubangamiye bakarwereka icyo Kiliziya ibivugaho. Ni byiza ko rutegwa amatwi kugira ngo rubashe kugirwa inama.

Mu gusoza Umushumba uyobora iyi komisiyo yashimye ko urubyiruko rutangiye kwibonera ibirubangamiye. Ati “ ni byiza ko mwamagana ikibi nticyitiranywe ni icyiza, ikinyoma nticyitiranywe n’ukuri. Yasabye ko bagira uruhare mu gushaka ukuri no mu mu gushyigikira icyiza. Abayobora abandi bagombye kuba intangarugero mu migenzereze yabo ntibibe kubivuga mu magambo meza gusa.

Inama yari yitabiriwe n’abagize inama rusange: abahagarariye amadiyosezi n’imiryango urubyiruko.

 

Mbare kuwa 22 Kamena 2013

 

Padiri Charles HAKORIMANA                                Mlle Carine UMULISA

Umunyamabanga wa CEPJ                                    Perezida wa Komite y’Urubyiruko

(SE)                                                                           (SE)

 

 

Myr Servilien NZAKAMWITA

Perezida wa CEPJ n’Umushumba

wa Diyosezi ya Byumba

(SE)

 


Views: 10

Add comment